John Fleagle —
Blow Northerne Wynd

Middle English lyrics of Ms. Harley manuscript 2253

     Blow, northerne wynd,
     Sent thou me my suetyng!
     Blow, northerne wynd,
     Blou! Blou! Blou!

Ichot a burde in boure bryht,
That sully semly is on syht:
Menskful maiden of myht,
Feir ant fre to fonde.
In al this wurhliche won,
A burde of blod ant of bon
Never yete y nuste non
Lussomore in londe!

     Blow, northerne wynd,
     Sent thou me my suetyng!
     Blow, northerne wynd,
     Blou! Blou! Blou!

Heo is dereworthe in day:
Graciouse, stout, ant gay,
Gentil, jolyf so the jay,
Wohrliche when heo waketh.
Maiden murgest of mouth –
Bi est, bi west, by north and south,
Thér nis fiele ne crouth
Tat such murthes maketh.

     Blow, northerne wynd,
     Sent thou me my suetyng!
     Blow, northerne wynd,
     Blou! Blou! Blou!

To Loue, that leflich is in londe,
Y tolde him, as ich understonde,
How this hende hath hent in honde
On huerte that myn wes,
Ant hire knyhtes me han so soht,
Sykyng, Sorewyng, ant Thoht,
Tho three me han in bale broht
Ageyn the power of Péés.

     Blow, northerne wynd,
     Sent thou me my suetyng!
     Blow, northerne wynd,
     Blou! Blou! Blou!

For hire loue y carke ant care,
For hire loue y droupne ant dare,
For hire loue my blisse is bare,
Ant al ich waxe won.
For hire loue in slep y slake,
For hire loue al nyht ich wake,
For hire loue mournyng y make
More then eny mon.

     Blow, northerne wynd,
     Sent thou me my suetyng!
     Blow, northerne wynd,
     Blou! Blou! Blou!

     Blow, northerne wynd,
     Sent thou me my suetyng!
     Blow, northerne wynd,
     Blou! Blou! Blou!